معتقدات شاميه

* اذا انكسرت كاسة بيقولوا: انكسر الشر
(تقولوا الشر مخلوق من الزجاج)


* اذا مر حدا فوق الطفل بيقولوا ما بقا يطول!
( انو اذا طفل صغير متسطّح ما بصير حدا يمر من فوقوا ليشششش لان ما بعود بيطول الولد بيطلع قصير؟؟!!! و متل ما بقول المتل فشخة حية ولا فشخة بنية)



* قص الاظافر بالليل هوه مو منيح
(لا تسألو ليش؟أنا ما بعرف ولا حدا بيعرف بس مينو منيح وآخر مينو منيـح )


* رش المياه فراق
(ما بصير حدا يرش رفيقو بالمي لان بعدين بيتفرقوا وكإنواعم يرشه بزيت الكاز )



* ياللي بيفوت على بيت جديد بيفوت معه عرق اخضر و مقص و مصحف و يدخل بالرجل اليمين!
(واللي بيعمل غير هيك بيتحول لسعدان !!)


* اذا اجت الكندرة فوق الكندرة يعني رايحين مشوار
(واذا اجت تحتها يعني راجعين من المشوار ؟؟)

* اذا زحف الولد او زقزقت العصافير معناها جاينا ضيوف
(وبهيك حاله لازم توقفوا ورى الباب لانهم بكونوا طالعين عالدرج)


*اذا طنت ادنك اليمين حدا عم يحكي عنك بالمنيح و اذا طنت اليسار معناها حدا عم يجيب سيرتك بالعاطل
(واذا طنوا مع بعض معناها طرشت ويعوض الله عليك)


* اذا كان في خناقة بيقولوا اقلبوا الصرامي لتحمى الخناقة
(شماته ) والله لا يشمت حدا فينا!..



* اذا رفت عيني اليمين بيكون جاينا خبر طريف
*اذا رفت عيني الشمال بيكون جاينا خبر مو منيح
(اما اذا رفوا التنتين سوى فأنت اكيد حاتصير أحول)



* اذا حكني حاجبي اليمين معناها بدنا نستقبل حدا جاي من السفر
*أما اذا حكني حاجبي الشمال معناها بدنا نودع حدا حيسافر
*إذا حكني كفي اليمين معناها بدي أقبض مصاري
*و إذا حكني كفي اليسار معناها بدي أدفع مصاري
(اما اذا حككوك كلهن أو أي شي تاني بقى فأنت اكيد جربان
ولازم تروح الحمام)


* و ما بصير تتحمم بالليل
(طبعا شي بديهي لأن اكيد المي حاتكون مقطوعه)


*و ما بينفع كب المي بالبلوعة بالليل من غير التسمية بالله و الاستعاذة أولاً!..
(يالطيف مشان ما يؤذونا ولا نأذيهن بس عرفتوا مين هدول؟؟.
والله ولا أنا !..)

*واذا شفت مقص مفتوح لازم فورا تسكرو!..
( لانو المقص المفتوح بيعمل خناقـــه!..يالطيف)



*وإذا عمل العصفور تحتو على الأواعي يعني جاييكون رزقـه!..
(وما لازم تغسل ملابسك منها!..حتى ماتروح عليك الرزقه!..)


*و دلق القهوه كمان رزقه!
(وكمان نفس الحكي خليها موسخه وما تنظفها!..)


*و شرب المي بعد القهوة قلة زوء
(حتى لو اتشردقت!.. موت ولا تشرب مي!.. )


*و اذا الولد الصغير ابن شهور عم يضحك لحالو بيقولو الملايكه بتكون عم تحاكيه!..
بس ما حدا بيعرف بيشو عم تحاكيه!..


* و كمان في اعتقاد انو اذا البنت اول ما خلقت وطوطوها ( يعني دهنوها بدم وطواط ) ما بيعود بيطلعلها شعر بجسمها أبداً
( بس عرفتوا ليش أكثر البنات عندهم شعر كتير على رجليهن؟ )



* كمان يلي بتكون حامل بصبي بتتباشع واذا حامل ببنت بتتحلا
* وإذا الطفل قعد بالصينية وهي عالأرض بيرتعبوا لأنه هاد الولد رح يضيع (ويمكن يتشرد هادا اذا ما طلع حرامي كمان )



* و كمان إذا حدا صبلك شاي او قهوة وملى الفنجان كتير بكون قلبوه مليان منك واذا صبها ناقصة هدا دليل على انو هالشخص ناقص
(خلصونا بقا خلصــونا....)

*واذا عندك ضيف اتقيل الدم وبدك يروح من عندك عالسريع شك دبوس او عدة دبابيس بإيد المكنسه او اقرأ سورة الزلزلة
(بس اكيد في عالم اذا بتقرأ القرأن كله من أوله لآخره بيضلوا لازقين في خلقتك لذلك ماتحاول!..)

*واذا خايف من عين اتصيبك جيب ورقة واكتب عليها اسم الشخص الي خايف من عينو وغزها بالدبوس وانت عم تقراء المعوذات وتقول من عين افلان و تنفخ...
(وفي حل تاني انك تروح تشيل عيونه وبلا وجعة راس!)


*والي بيعدّ النجوم بيطلعلو تالولات بايدو
(بس اذا أحسن يعدهم مابيطلع شي)


*وبعد ما نخلص من الصلاة نطوي السجادة مشان الشيطان ما يصلي عليها
(خلّيه يصلّي بركي بيتوب ويصير يوسوسلنا بالخير!!)

مشكووووووووووووور يا مشرفنا على هالافاااده الراااااائعه و النهفه
هههههههه